Rõugõ
Märdisantõ laul
MÄRDI’ OMMA’ KAUGÕLT TULLU’, märti,
läbi suu supa-sapa,
läbi pikä pilliruu.
Pilliruug seo pisti silmä,
kastõhain seo lõigas´ kaala.
Märdil küüdse’ külmetäse’,
Märdil varba’ valutasõ’.
Puhu’ no tuld tuhkhavvast,
laskõ’ märti lämmäle!
Ega mii’i olõ’ nälläsandi’,
mii’ olõmi’ nall´asandi’.
Andidõ pallõminõ:
TÕSTA’ NO LINKI, LIISUKÕNÕ, märti,
ava’ no usta, Annõkõnõ!
Võta’ pirdu parrõ päält,
puhu’ tuld tuhkhavvast!
Võta’ võti varna otsast,
aja’ tii aida poolõ,
käänä’ tii keldre poolõ –
lõika’ lihalipsukõisi,
kaksa’ rasvaraasakõisi.
Tuu’ linakurstikõisi,
saada’ villapeotäüt!
Märt ei taha’ tsialiha,
ega’ kalgõ kanaliha –
Märt taht pehmet hanipraati
ja ka Päidsü pääliha.
Viis ja tekst: ERA III 7, 57 (30) & ERA II 56, 127/8 (8< Rõuge khk, Tsooru v, as – Herbert Tampere < Juuli Peegli, 70 a (1932). Fon 362 d.