Rõugõ
Imelik maja
VAENÕ MIIS TEKK’ VAR’OKÕSÕ,
ehitelli elokõsõ.
Esi’ oll’ sant ja tegi sanna,
vaenõ miis jo tegi var’o!
Ragi kulda kuusõpuida,
pedäjätsi pirrupuida.
Kuu õks vidi kuusõpalkõ,
aestaja alospalkõ.
Nakas’ tulpõ tahovamma,
tarõ nulkõ nüpeldämä.
Tekk’ tä korsna kuu poolõ,
päävä poolõ päälise,
tähti poolõ tarõ aknõ’,
pilvi poolõ piidapuu’,
undsõ poolõ ussõ tekk’.
Tekk’ tarrõ tõristõnna,
elotusõ ilmaviirde.
Es olõ’ muro muanõ,
tarõ essin tahmatõdu.
Ai tä jäle’ järve poolõ
Tekk’ tä tii tiigi poolõ.
Müüdä käve’ muu maa mehe’,
rikka’ Riia raadiherrä’,
Pihkva pikä’ poodipoisi’,
Küsütelli’, nõvvatõlli’,
ilmakorgi’ kõnõligi:
“Kelles seo rikas Riia liin,
kell seo kallis kaubaliin?”
Õlõ-õi liina, olõ-õi lippu,
olõ-õi pikk Pihkva liin,
olõ-õi rikas Riia liin!
Minge’ sisse, ostkõ’ siidi,
poisi’ piibu pitsisidä,
neio’ hõpõsõrmussida,
mehe’ vele’ mitund kaupa,
naase’ tano narmikida.
Sõitkõ’ sisse, siidilaiva’,
Soodama puult soolalaiva’,
kavvõst tulkõ’, kalalaiva’,
sisse käändke’ silgilaiva’.
Seo um sandi sannakõnõ,
vaesõ mehe var’okõnõ.
Viis ja teks: EÜS VI 32 (52) < Rõuge khk, Haanja v, Sika k – Jaan Gutves < Ann Kado, 76 a (1909).